ന്യൂഡല്ഹി: കോവിഡ് ബാധിച്ചവര്ക്ക് ഡെല്റ്റയെ അപേക്ഷിച്ച് ഒമിക്രോണ് വകഭേദം ബാധിക്കാനുള്ള സാധ്യത മൂന്ന് മുതല് അഞ്ചുമടങ്ങ് വരെ അധികമാണെന്ന് ലോകാരോഗ്യസംഘടന.
കോവിഡ് ബാധയെ തുടര്ന്ന് ലഭിക്കുന്ന സ്വാഭാവിക രോഗപ്രതിരോധശേഷിയെ മറികടക്കാന് കഴിവുള്ളതാണ് ഒമിക്രോണ് വകഭേദം. ഇതിനാലാണ് ഒമിക്രോണ് ബാധിക്കാനുള്ള സാധ്യത കൂടുന്നതെന്നും ലോകാരോഗ്യസംഘടനയുടെ യൂറോപ്പ് കാര്യ റീജണല് ഡയറക്ടര് ഹാന്സ് ഹെന്റി പി. ക്ലൂഗെ പറഞ്ഞു.
മുന്പ് കോവിഡ് വന്നവര്ക്കും വാക്സിനെടുക്കാത്തവര്ക്കും മാസങ്ങള്ക്ക് മുന്പ് വാക്സിനെടുത്തവര്ക്കും ഒമിക്രോണ് ബാധിക്കാം. കോവിഡ് ഒരു തവണ വന്നവരും കൂടുതല് ജാഗ്രത പാലിക്കണം. വാക്സിനെടുക്കാത്തവര് ഉടന് തന്നെ വാക്സിന് സ്വീകരിച്ച് സുരക്ഷിതമാകാന് ശ്രമിക്കണമെന്നും അദ്ദേഹം പറഞ്ഞു.
ടെസ്റ്റ് കൂട്ടി കോവിഡ് ബാധിതരെ ഉടന് തന്നെ കണ്ടെത്തി നിരീക്ഷണത്തിലാക്കണം. സമ്ബര്ക്കപ്പട്ടിക തയ്യാറാക്കി എല്ലാവരെയും നിരീക്ഷണത്തിലാക്കി എന്ന് ഉറപ്പാക്കണം. പ്രാഥമിക ചികിത്സ ലഭ്യമാക്കാന് വേണ്ട നടപടികള് സ്വീകരിക്കണം. കോവിഡ് കേസുകള് ഉയര്ന്നാല് അതിനെ നേരിടാന് ആശുപത്രികള് സജ്ജമാക്കണമെന്നും അദ്ദേഹം നിര്ദേശിച്ചു.
യൂറോപ്പില് പുതിയ കോവിഡ് ബാധിതരുടെ എണ്ണം പത്തുലക്ഷത്തിലധികമാണ്. നിലവില് യൂറോപ്പില് കോവിഡ് ബാധിച്ചവരുടെ എണ്ണം 10 കോടി കടന്നിരിക്കുകയാണ്. ആഗോളതലത്തില് കോവിഡ് ബാധിച്ചവരില് മൂന്നില് ഒരാള് യൂറോപ്പില് നിന്നുള്ളയാളാണ്.
0 Comments